Elbasy otandyq BAQ ókilderine bergen suhbatynda «Uly dalanyń jeti qyry» maqalasyn qandaı maqsatta jazǵanyn aıtty.

– «Keńes odaǵynda ómir súrgende bizdiń tarıhymyz «Qazan revolúsıasynan» bastalady dep oqytty. Odan ary qaraı eshteńe joq sıaqty. Bárimizdiń mektepte de, joǵary oqý ornynda da oqyǵanymyz osy. Sondyqtan balalarymyz «sender qaıdan shyqtyńdar?» dese, durystap jaýap bere almaıdy. Bizdiń úlken tarıhymyz bar ekenin jastarymyz bilýi kerek. Tarıhymyz Saqtardan, Ǵundardan, Uly Túrki dúnıesinen bastaý alady desek te bolady. Biz sol kezden beri qaraı kele jatyrmyz. Mońǵoldardyń kóbi qypshaqtar, qazaqtyń birneshe rýynan quralǵan. Sondyqtan óskeleń urpaq osynyń bárin bilsin dep jazdym. Bizdiń qadym zamannan kele jatqan tereń tarıhymyz bolǵan. Kúni keshe ǵana aspannan salbyrap túsken joq. Biz úlken taıpalardyń, halyqtardyń, úlken ımperıalardyń urpaǵymyz dep jastarymyz aıtyp júrsin degen maqsatpen jazdym. Sondaı-aq men bul maqalany búkil álemge at úıretý bizden bastalǵanyn, metalýrgıanyń bizde bolǵanyn, ǵylymǵa da, mádenıetke de ózimizdiń úlesimiz bar halyq ekenin kórsetý úshin jazdym. Menińshe, bul maqala jastarǵa kerek dep oılaımyn. Osy arqyly biz naǵyz tarıhymyzdy aıtyp júrýimiz kerek», – dedi Prezıdent BAQ ókilderine bergen suhbatynda.